Диаз — бассейнлы, Ильяс скейтбордлы булды!

Бассейн отучы Диаз Абраров Дуван районының Өлкенде мәктәбендә укый, быел 3нче сыйныфка күчкән. Күп укырга ярата, шуңа да “Әллүки”не көтеп ала.

— Журналны чыга башлаган чагыннан алдырабыз. Улларым үскәч тә язылачакмын әле аңа, — ди Диазның әнисе Эльза Фәдәнис кызы.

Абраровлар дүрт малай тәрбияли.

— Улларыбыз барысы да акыллы, тәртипле. “Әллүки”не укып үскән балалар башка төрле була да алмый, — дип елмая әтиләре.

Тагын да бер шәп приз — скейтборд Күгәрчен районының Күгәрчен авылыннан Ильяс Абдуллинның өлешенә төште. Ул быел 2нче сыйныфны тәмамлаган. Ильяс сыйныфтагы иң актив, шук, спорт яратучы малай­ларның берсе.

Яшь дустыбыз бик матур гаиләдә тәрбияләнә. Әтисе мәктәп автобусын йөртә, әнисе балаларга татар һәм урыс теле дәресләрен укыта. Ильясның абыйсы һәм кечкенә энекәше бар. Җиңүчебезнең әти-әнисе күп еллар инде “Кызыл таң” гәзитен алдыра, ә уллары “Әллүки” журналын көтеп ала.

Кызлар һәм малайлар! “Әллүки”дә сентябрь аеннан өр-яңа конкурс башлана. Бүләкләр шәп булачак! Сез дә бәйгеләрдә катнашыгыз, бүләкләр отыгыз!