“Сул якта йөрәк яшәсә, уң якта нәрсә?"

Билгеле гимнастка һәм телевидение тапшырулары алып баручысы Ләйсән Үтәшева  телеграм-каналдагы сәхифәсендә балачактагы фотосын куеп, сөекле әнисен искә алган.

“Фотода миңа 4 яшь... Балачакта мин табиб булып уйнарга ярата идем. Бервакыт әнидән: “Сул якта йөрәк яшәсә, уң якта нәрсә?" - дип сорадым. Ул: “Җан, кызым, җан, һәм ул бик еш сызлана”, - дип җавап бирде.

Бүген әниемә 60 яшь тулган булыр иде. Хәтерлим, сагынам һәм чиксез яратам…”, - дип язган күренекле спортчы.

Билгеле булуынча, Ләйсән Үтәшева 1985 елның 28 июнендә Әлшәй районының Раевка авылында туган. 1989 елда кызчык гаиләсе белән Волгоградка, ә аннары Мәскәүгә күченеп килә. Спорт белән дүрт яшеннән шөгыльләнеп, зур уңышларга ирешкән спортчы җәй саен диярлек туган ягына кайта.

"Раевкадан көч алдым һәм алачакмын!" - ди якташыбыз.  

Фото: Ләйсән Үтәшеваның телеграм-каналыннан