Үзебезнең уенчыклар матур да, сыйфатлы да!

Илебездә уенчыклар җитештерүчеләр импортны алыштыруга йөз тота. Бу хакта алар Уфада узган “Айда/Әйҙә играть” II Бөтенрусия фестивалендә сөйләделәр.

Мәсәлән, Ульяновск өлкәсендә фабрикасы булган Белоруссия-Русия компаниясе күргәзмәдә 500дән артык уенчык тәкъдим итте. Генеральный директор Вячеслав Гнутов сүзләренчә, комания яңалыкларның берсе – популяр Дания брендына тулысынча охшаш конструктор.

– Әмма ул күпкә яхшырак, чөнки без үзебезнең анимацион образларыбызны кулланабыз, – дип ассызыклады Вячеслав Гнутов.

Хәзер балалар  “Простоквашино” мультфильмы персонажлары белән конструктор җыя ала. Предприятиенең планында – "КамАЗ"маркалы уенчык йөк машиналары чыгару.  Бүген фабрика 1148 төрле товар җитештерә. Алар илнең төрле кибетләрендә һәм маркетплейсларда бар. Сүз уңаеннан, бу уенчыклар белән фестиваль чатырларында да танышырга була.

– Иң мөһиме, уенчыклар безнең Русия чималыннан ясалган, хәвефсез. Бу азык-төлек пластмассасы, азык-төлек буяулары, –  дип билгеләп үтте Вячеслав Гнутов.

Киров өлкәсеннән килгән компаниянең генераль директоры Ольга Доротюк үзләре җитештерә торган курчаклар турында сөйләде.

– Без педагогик берләшмә белән актив аралашабыз һәм балаларыбызның ихтыяҗларын беләбез. Балалар бакчалары өчен тәкъдим ителгән исемлеккә йөз тотабыз, – ди җитәкче.

Сүз уңаеннан, фестивальдә предприятие милли костюмнарда курчакларның уникаль коллекциясен тәкъдим итте.

Фото: “Айда/Әйҙә играть”  матбугат хезмәте