“Безнең кулга эләккәнче, журнал нинди юл уза?”

Кунаклы йорт – хөрмәтле йорт, дигән борынгылар. “Әллүки” журналы редакциясе дә бүген кунаклар кабул итте. Матбугат йортына безнең күптәнге дусларыбыз – “Нур” театрының балалар студиясендә шөгыльләнүче  кызлар һәм малайлар килде.

Остазлары Айгөл Юлъякшина һәм әти-әниләре җитәкчелегендә килгән кызлар һәм малайлар өчен сәфәр "Башкортстан Респуликасы Нәшрият йорты" типографиясеннән,  гәзит-журналларны басу цехыннан башлады.

–  Ух!.. Монда чын заво-о-од!

– Бу машиналар берәр кайчан туктап торамы?

– “Әллүки” кайсы машинада басыла?

–  Ә монда тычканнар бармы? –  балалар кызу эш кайнаган, полиграфия машиналары һәм җиһазлары гүләве астында берсен-берсе бүлдерә-бүлдерә сораулар яудырды. Һәркем үз эшен белеп башкаручы абый-апаларны  гаять кызыксынып күзәтте алар. Китап төпләү цехы начальнигы Татьяна Коновалованың  мавыктыргыч  итеп сөйләвен хәтта әти-әниләр дә кызыксынып тыңлады.

– Типографиядә төнлә дә эш тынмый. Һәр көнне безнең хезмәткәрләр уртача 500 меңнән артык гәзит-журнал баса. Ә иртәнгә аларны инде почта машинасы көтә, – ди Татьяна Григорьевна.

Ә соңыннан  яшь дусларыбыз чын-чынлап иҗат тормышы гөрләгән “Кызыл таң” гәзите һәм аның канаты астында чыгып килүче “Тулпар”, “Әллүки” журналлары редакцияләренә юл тотты. Балалар гәзит-журналлар басмага тапшырылганчы гаять зур юл үтүен үз күзләре белән күрде. Һәр бүлектә журналистларның үз темалары буенча мәкаләләр язуына, урынбасарларларның  тикшерү-төзәтү, корректорларның хаталарны “чүпләү”,  хәтта баш мөхәррирнең алдагы кварталга план төзү эшенә дә шаһит булды алар.

– Бүген сез журналист һөнәренең нечкәлекләре белән таныштыгыз. Татар төркемендә шөгыльләнүче балалар булгач, киләчәктә милли матбугат өлкәсендә хезмәт салачак кызлар һәм егетләр нәкъ сезнең арададыр дип өметләнәбез. Ә әлегә “Әллүки” журналын укып, туган телне өйрәнеп үсегез! – диде баш мөхәррир Фаил Камил улы Фәтхетдинов.  

Айгөл Закир кызы һәм әти-әниләр әлеге чараны оештыручыларга ихлас рәхмәт сүзләрен белдерде:  “Матбугат дөньясына сәяхәт балалар күңелендә матур истәлек булып сакланачак. Безнең балалар “Әллүки” журналын яратып укый. Алдагы елда да без сезнең дуслар сафында!”

Динар Кәлимуллин фотосы.