Берьюлы дүрт игезәк кыз!

Ил тарихында бер йомыркалы дүрт игезәк бала тууның беренче очрагы теркәлгән. Бу хакта Санкт-Петербургның 17нче бала тудыру йорты матбугат хезмәте хәбәр итә.

"32 атналык булып дөньяга дүрт сөйкемле кыз туды. Статистика буенча, монохориаль, бер йомыркадан дүртәү туу — 15,5 млн бала тудыруга бер очрак. Илдә мондый уникаль очраклар әлегә теркәлмәгән”, - дип белдергән табиблар.

Яңа туган балаларның авырлыгы — 1,36-1,64 кг, буйлары – 37-41 см. Белгечләр балаларның хәлен, йөклелек вакытын исәпкә алып, яхшы дип бәяли. Ирешелгән нәтиҗә йөклелекне дөрес алып бару һәм табибларның һөнәри осталыгы аркасында мөмкин булды, дип ассызыклаганнар бала тудыру йортында.

Фото: Санкт-Петербургның 17нче бала тудыру йорты матбугат хезмәте