Поезд Кырымга илтә!

Кырымга 23 һәм 24 декабрь көннәрендә кузгалачак поездларга беренче ике тәүлек эчендә генә 10 мең билет сатылган. Билгеле булуынча, билетлар сату 8 ноябрьдә башланды. Аларны сату буенча сайтта зур йөкләнеш булу сәбәпле, хәтта проблемалар да килеп чыккан. Бу хакта Русия Президенты Владимир Путин белән очрашуда вице-премьер Максим Акимов хәбәр итте.

Вице-премьер ассызыклавынча, поездлар хәрәкәтенә старт бирү өчен барысы да әзер. Беренче поезд Санкт-Петербургтан — 23 декабрьдә, Мәскәүдән 24 декабрьдә кузгалачак.

Пассажирлар йөртүне “Гранд сервис Экспресс” шәхси операторы башкарачак. Поездлар Санкт-Петербургтан һәм Мәскәүдән Кырымга 43 һәм 33 сәгать барачак. Көн саен һәр шәһәрдән берәр состав чыгып китәчәк. Поездлар хәрәкәте Кырым күпере төзелгәннән соң мөмкин булды.