Балалы гаиләләргә — дәүләт ярдәме

15 гыйнварда Русия Президенты Владимир Путин Федераль җыелышка еллык Юллама белән мөрәҗәгать итте. Президент Юлламада билгеләгән өстенлекләрнең берсе балалы гаиләләргә ярдәм итүгә юнәлтелгән. Ил башлыгы 2020 елның 1 гыйнварыннан өч яшьтән җиде яшькә кадәр балаларга айлык түләүләр кертергә тәкъдим итте.

Башлангыч этапта керемнәре бер кешегә бер яшәү минимумыннан артмаган гаиләләрдә пособие күләме 5,5 мең сум тәшкил итәчәк, ә алу процедурасы мөмкин кадәр гади булачак.

"Без бу системаның ничек эшләвен аңларга һәм бәяләргә тиешбез, әгәр дә гаиләләрнең 5,5 мең сум алып, яшәү минимумына җитмәвен аңлыйбыз икән, киләсе адым ясарбыз — алдагы елдан тулысынча түли башлыйбыз, бу 11 меңнән артык", —диде Владимир Путин.

Фото:"Башинформ".