Тозланган яшелчәләрнең файдасы бармы?

Диетолог Анастасия Колчина берьюлы 200 граммнан да артык тозланган яшелчә ашамаска һәм атнага өч тапкырдан да ешрак кулланмаска киңәш итә. Бу сәламәтлеккә зыян китермичә генә организмны витаминнар һәм микроэлементлар белән тәэмин итү өчен җитәрлек. Хәвефсез күләм шул исәптән сәламәтлек торышына, хроник авыруларның булу-булмавына да бәйле.

Диетолог гипертония вакытында берьюлы 100 граммнан да артык маринадланган яшелчә ашарга ярамый, дип ассызыклый. Бу ризыкларда тоз күп. Натрий хлоридын артык кулланганда организмда сыеклык балансы бозыла. Моның аркасында шешенү барлыкка килергә һәм артериаль басым күтәрелергә мөмкин.

Ашказаны-эчәклек системасы авырулары һәм диабет булганда тозланган яшелчәләрдән тыелырга кирәк. Маринадланган ризыкларны гастрит һәм ашказаны җәрәхәте авырулары кискенләшкән чорда кулланырга ярамый. Аз кулланганда тозланган яшелчәләр организмда матдәләр алмашыну процессын активлаштыра һәм ашкайнатуны яхшырта. Маринадланган яшелчәләрне табиблар киңәш иткән күләмдә генә ашаган очракта, алар ашказанында һәм эчәклектә ферментлар бүленеп чыгуны көчәйтә, шулай ук майлы һәм кыздырылган ризыкны үзләштерүдә ярдәм итә. Тозлыкны ашларга, салатларга өстәргә һәм хәтта аппетитны яхшырту өчен эчәргә мөмкин, белеп кенә кулланганда ул да файдалы.

Фото:patee.ru