Кәефне күтәрүче җиләкне яратасызмы?

Кура җиләгендәге кумарин, бакыр һәм тимер канны яхшырта һәм тромблар барлыкка килү куркынычын киметә, ә крыжовниктагы шатлык гормонының үсемлек аналогы –  серотонин кәефне күтәрергә ярдәм итә. Бу хакта «Газета.Ru" басмасына Пермь политехник университетының тормыш хәвефсезлеге кафедрасы профессоры, медицина фәннәре докторы Нина Вишневская сөйләгән.

Белгеч сүзләренчә, кура җиләге аеруча файдалы санала. Җиләк салицил кислотасына бай, шуның аркасында салкын тию вакытында температураны төшерергә ярдәм итә.

"Моннан тыш, кура җиләгендә эллаг кислотасы — куәтле антиоксидант бар, ул, тикшеренүләр күрсәтүенчә, ул яман шеш күзәнәкләренең үсешен басарга һәм картаю процессын акрынайтырга сәләтле, шулай ук кумариннар — тромбозлар куркынычын киметә торган матдәләр”, — дип билгеләгән эксперт.

Кура җиләгендә шулай ук кан булдыру өчен кирәкле тимер һәм бакыр бар, ә калий һәм магний йөрәкне эшләтә һәм кан тамырларын ныгытырга ярдәм итә.

Ләкин аны подагра, бөер авырулары, ашказаны җәрәхәте һәм кискенләшү стадиясендә гастрит булган кешеләргә, шулай ук канның оешуы бозылган очракта саклык белән кулланырга кирәк. Сәламәт өлкән кешегә көненә 300 граммнан кура җиләге ашарга киңәш ителә.

Тагын бер файдалы җиләк буларак галим крыжовникны атаган. Крыжовник гәрәбә кислотасына бай, ул матдәләрнең күзәнәк алмашынуын яхшырта, бавырга токсиннарны чыгарырга булыша һәм физик йөкләнешләрдән соң тернәкләнүне тизләтә. Пектинның югары булуы авыр металл тозларын чыгаруга ярдәм итә һәм эчәклекнең сәламәт микрофлорасын саклый. Шулай ук җиләктә серотонин шатлыгы гормонының үсемлек аналогы да бар.

«Крыжовникның файдасы булуга карамастан, аның кайбер катгый каршы күрсәтмәләре бар: бу җиләкне ашказаны җәрәхәте, кислоталылыгы югары булган гастрит, панкреатит һәм энтероколит кискенләшкән чорда куллану һич тә киңәш ителми, чөнки тыгыз кабыгы, вак орлыклары һәм органик кислоталарның югары концентрациясе ялкынсынган ашказанын ярсыта гына”,-дип кисәтте белгеч.

Автор фотосы.