Октябрьдә иммунитетны ничек ныгытырга?

Белгеч иң файдалы ризыкларны рационга кертергә киңәш итә.

title

Октябрьдә иммунитетны ныгыту өчен рационга кәбестә, болгар борычы, кабак, җиләкләр һәм әче сөт продуктларын кертергә кирәк. Бу хакта "РИА Новости"га Приморье сәламәтлек саклау министрлыгының штаттан тыш баш диетологы Ольга Ямилова сөйләгән.

Медицина фәннәре кандидаты белдерүенчә, көз уртасына җиләк-җимеш һәм яшелчәләр ассортименты кими башлый. Шуңа күрә бу чорда төрле кәбестәләргә — ак һәм кызыл кәбестәгә, брокколи, төсле һәм Брюссель кәбестәсенә игътибар бирергә мөмкин. Алар С витамины чыганагы булып тора.

С витамины күп булган ризыкларга болгар борычы да керә. Белгеч бу яшелчәнең аскорбин кислотасына бай булуын билгеләгән.

Октябрьдә алма, груша, айва, слива, хөрмә, киви, инҗир һәм виноград ашарга киңәш ителә. Хөрмә һәм виноград составында антиоксидант үзлекләргә ия антоцианнар бар. Җиләкләрдән исә мүк җиләге, нарат җиләге, сырганак һәм гөлҗимешкә игътибар итәргә була. Алар полифенолларга һәм С витаминына бай.

Рационда каротиноидлар чыганаклары булган чөгендер, кишер һәм кабак та булырга тиеш. Ә эчәк микробиотасын саклау өчен әче сөт ризыкларына һәм тозланган кәбестә куллану файдалы.

Автор:Юлия Төхбәтуллина

Читайте нас