“Нәни бакчачы” фотоконкурсы тәмам!

“Нәни бакчачы” фотобәйгесе тәмам, дуслар! Конкурс шундый күңелле барды, электрон почтага, “В контакте” социаль челтәрендәге биткә, ватсапп номерына фотолар “явып” кына торды.

“Әллүки” журналы оештырган конкурста республикабызның төрле районнарыннан, Татарстаннан, Ханты-Манси автономияле округыннан – барлыгы 65 нәни бакчачы катнашты. Алардан 250дән артык берсеннән-берсе матур фотолар килде.

Конкурс шартлары буенча “Әллүки” сайтында (https://alluki.rbsmi.ru/articles/fotokonkurs/) иң күп караулар җыйган фото хуҗасы җиңүче булачак дип вәгъдә иттек. 7 августның 9:00 сәгатенә Уфа шәһәреннән София Беглованың фотосы караучылар саны буенча рекорд куйды. Нәни бакчачының фотосын 478 кеше караган! Афәрин, София! Җиңүчене редакциядә матур бүләк – “Нәни иҗатчылар” җыелмасы көтә.

Сюрпризлар моның белән генә бетми әле! Софиянең, шулай ук бу бәйгедә аеруча активлык күрсәткән тагын берничә нәни бакчачының фотолары “Әллүки” журналында басылып чыгачак.

Һәм... Бу бәйгедә катнашучы барлык балалар “Әллүки”нең махсус Мактау грамотасы белән бүләкләнәчәк.

Эшкә уңган, тырыш кызлар һәм малайлар! Кечкенәдән хезмәт сөеп үскән нәни дусларыбыз! Барчагызга да тик уңышлар юлдаш булсын!