"Чыдамнар" җиңде!

"Исәнмесез, "Әллүки"челәр! Сезгә Миякә районы "Теремкәй" балалар бакчасының өлкәннәр төркеменә йөрүче кызлар һәм малайлар яза.

Безнең бакчабызда күңелле чаралар еш үтә. Алар "Әллүки" журналы битләрендә дә яктыртылды. Рәхмәт сезгә, апа-абыйлар!

Бүген безнең бакчабыз янә шау-гөр килде. Тренерыбыз Алсу Сабирҗан кызы Сабирова белән Венера Зәкәрия кызы Гаязова җитәкчелегендә "Күңелле стартлар" үтте.

Без ике командага - "Көчлеләр" һәм "Чыдамнар"га бүленеп, ярышларда катнаштык. Һәр командада унар кеше булды. Кәшәкә белән дә, туп һәм скакалка белән дә биремнәр булды. Безгә тәрбияче апаларыбыз - Җәмилә Әнгам кызы Батталова һәм Гөлсинә Зәлиф кызы Шәрәфетдинова ярдәм итте, төрлечә күңелне күтәреп, җиңүгә рухландырып торды.

Жюри рәисе - өлкән тәрбиячебез Татьяна Павловна Шибитова бик гадел бәя бирде. Нәтиҗәдә, "Чыдамнар" командасы, 1 балга күбрәк нәтиҗә күрсәтеп, беренчелекне алды. Безне Мактау грамоталары һәм татлы күчтәнәчләр белән бүләкләделәр".