БДИны 400 баллга тапшырган!

Тула өлкәсендә чыгарылыш сыйныфы укучысы Даниил Дрябин Бердәм дәүләт имтиханнарында 400 балл җыйган. Ул дүрт предметны да 100әр баллга тапшырган.

Даниил физика-математика сыйныфында укыган. Шуңа да ул физика, математика, информатика фәннәреннән яхшы әзерлекле булган. Укучы билгеләвенчә, аның зур уңышка ирешүендә гаҗәпләнерлек нәрсә юк.

- Имтихан тыныч үтә, андагы биремнәр узган елдагыга охшаш иде, шуңа да бу минем өчен көтелгән хәл булды, - ди ул.

Даниил Мәскәүнең физика-техник институтына яисә Ломоносов исемендәге Мәскәү дәүләт университетына укырга керергә ниятли.