Мәктәпкә тәм-том автоматлары кирәкме?

Башкортстанның мәгариф министры вазыйфасын башкаручы Айбулат Хаҗин Хөкүмәт йортында үткән оператив киңәшмәдә мәктәпләрдә куелган тәм-томнар һәм шоколадлар автоматларына каршы булуын белдерде.

Ведомство җитәкчесе сүзләренә караганда, тикшерү нәтиҗәләре мондый автоматларда продукциянең калориялелек нормаларына, шулай ук, яраклылык вакытына туры килмәвен күрсәткән.

- Бу бөтенләй ярамаган эш. Беренчедән, мондый ризык балаларның аппетитын боза, икенчедән, сәламәт кайнар ризык белән тәэмин итүгә һәм сәламәт туклану культурасын үстерүгә каршы килә, - дип билгеләп үтте Айбулат Хажин.

Айбулат вәкил улы мондый автоматларга еш кына ата-аналар зарлануын да ассызыклады.

Киңәшмәдә автомат хуҗалары белән аларны балалар өчен зарарлы булмаган ризыклар һәм эчемлекләр белән комплектлау мөмкинлеге турында килешергә кирәк дигән нәтиҗә ясалды.