Юл кагыйдәләрен бозма, водитель абый!

Ел саен 20 майда Бердәм юл хәрәкәте иминлеге көне билгеләп үтелә. Җәйге каникуллар алдыннан балаларга юлда үз-үзеңне тотуның мөһим кагыйдәләре турында искәртү өчен яхшы сәбәп бу.

Юл хәрәкәте иминлеге көне уңаеннан “Дебют” балалар иҗат йортының "Халык фольклоры" түгәрәгенә йөрүчеләр zoom платформасында онлайн-дәрестә катнашты. Педагоглары Гүзәл Заһитова җитәкчелегендә балалар юл билгеләренең нәрсә аңлатуын, кагыйдәләрне искә төшерде, табышмаклар чиште, транспорт чаралары буенча биремнәр үтәде.

— Кызлар һәм малайлар өчен дәрес файдалы да, кызыклы да үтте. Барысы да сорауларга актив җавап бирде һәм үз белемнәрен күрсәтте. Мондый чаралар укучыларны тормышка әзерләү өчен бик кирәк, — ди Гүзәл Миртимер кызы.

Уфаның 65нче Татар гимназиясе укучылары исә шушы көн уңаеннан “Водительгә хат” акциясендә катнашты. Балалар онлайн-дәрестә руль артында утыручы абыйларга, апаларга, юл кагыйдәләрен бозмаска чакырып, имин юллар теләп хатлар язды. Ә укытучылары балаларның изге теләкләрен водительләргә тапшырды.