88 мәктәпне ремонт көтә

2025-2027 елларда Башкортстанда Президент программасы буенча 88 мәктәп, 16 балалар бакчасы һәм 7 колледж төзекләндереләчәк. Бу максатларга республикага федераль бюджеттан 7 миллиард сумнан артык акча бүлеп биреләчәк. Алдагы өч елда Башкортстанда 146 мәктәп бинасы ремонтланган, аларда 55 меңнән артык бала укый. Бу хакта социаль челтәрләрдә Башкортстан Башлыгы Радий Хәбиров хәбәр итте.

Төбәк җитәкчесе билгеләп үткәнчә, республика үз көче белән мондый масштаблы эшне башкара алмас иде.

"Без Владимир Владимирович Путинга әлеге программа һәм аны мәктәпкәчә һәм урта һөнәри белем бирү өлкәсенә киңәйтү карары өчен рәхмәтле. Башкортстанда без урта һөнәри белем бирүнең матди-техник базасын модернизацияләү буенча эш алып барабыз, һәм федераль үзәкнең ярдәме безгә бик нык ярдәм итәчәк", - дип язган Радий Хәбиров.

Башкортстан Башлыгы хәбәр итүенчә, республика яңа мәктәпләр һәм балалар бакчалары төзүгә федераль финанслау алачак. Әйтик, Уфада 360 урынлык математик лицей-интернат булдыруга 2,4 миллиард сум бүлеп биреләчәк. Башкортстан көчле математика мәктәбе белән горурлана һәм төбәктә мондый белем бирү учреждениесен төзү күптән планлаштырыла.

Автор фотосы.