Иртәгә дәресләр башлана...

Иртәгә дәресләр башлана. Җәйге каникуллардан соң иң кыены нәрсә? Әлбәттә, иртән йокыдан тору. Беренче чиратта шуны аңларга кирәк – иртә торуны гадәткә кертү өчен кичтән иртә йокларга ятарга кирәк. Әйтик, тугызда ятып йокларга гадәтләнсәгез, иртәнге 6да, 7дә бер кыенлыксыз уянырга була. Әниләрегез дә сезне уята-уята арып, ачуланып туктамаячак.

Иртән җиңел уяну көндәлек шөгыльләргә дә бәйле. Дәресләрне вакытында әзерләп, урамга чыгып, саф һавада уйнап та алсаң, кичтән тиз йокыга китәрсең. Ә инде көне буе компьютер каршында яисә телефонда утыручы малайларның-кызларның иртән йокыдан тора алмаулары табигый хәл.

Мәктәпкә барасы көнне никадәр иртәрәк ятсаң, шулкадәр иртәрәк торырсың. Артык вакыт уяну, кичтән өлгермәгән вак-төяк эшләрне төгәлләп кую өчен бик кирәк. Ашыга-кабалана киенеп мәктәпкә йөгерү бер дә файдага түгел.  

Кичтән сумка-рюкзагыңны тутырып куюны да гадәткә керт.  Китап-дәфтәрләрне, ручка-каләмнәреңне салып, рюкзагыңны ишек янына ук чыгарып куй.

Хәерле сәгатьтә! Иртәгә дәрескә соңлама, дускай!

Автор фотосы.