“Мин Сезне бик көткән идем...”

Бүген, 20 майда, Нефтекамада Башкортстан Башлыгы Радий Хәбиров 17нче «Взлетай» урта мәктәбендә булды, анда ул беренче сыйныф укучысы Асель Сәетова һәм аның әнисе Гөлназ белән очрашты. Исегезгә төшерәбез, 2026 елның гыйнварында төбәк җитәкчесе кечкенә кыз белән Уфа хосписында танышкан иде һәм аның янына кунакка килергә вәгъдә итте.

Асель кечкенәдән үк активлык күрсәтә башлый, шуышырга, йөрергә өйрәнә, ә өч яшенә сүлпәнлек башлана – мускуллар зәгыйфьләнә, кыз йөрми башлый. Әлеге вакытта бала инвалид коляскасында гына йөри.

Балалар бакчасыннан соң Асельне 17нче «Взлетай» мәктәбенә кабул итәләр, аны 2022 елда уңайлы мохитнең заманча стандартлары буенча төзегәннәр. Гөлназ Сәетова кызының да музыка мәктәбендә укуын, вокал, фортепианода уйнау, хорда шөгыльләнүен сөйләде. Асель сәламәтлек үзенчәлекләре булган кешеләр өчен тегелгән адаптив кием төшерүдә катнаша.

— Мин Сезне бик көттем һәм һичшиксез безгә кунакка керәчәгегезне белә идем. Мин Сезгә күрсәтер өчен дәрестә алган «бишле»ләрне җыйдым. Үскәч, табиб яки фармацевт буласым килә, - дип сөйләде Асель һәм Радий Хәбировка әнисе белән бергә эшләгән картинаны һәм башка сувенирларны бүләк итте.

Республика Башлыгы үз чиратында кызга уку һәм иҗат дәресләре өчен планшет бүләк итте.

— Синең күпкырлы икәнеңне күрәм, бары тик "бишле"гә генә укыйсың. Сине Уфага Башкорт опера һәм балет театрында уза торган «Нәни принцессалар балына» кунакка чакырасым килә, – диде Радий Хәбиров. — Бүләкләрең өчен рәхмәт. Яхшы укы, ә иң мөһиме – авырма!

Төбәк җитәкчесе Асельнең сыйныфташлары белән дә аралашты. Балалар киләчәктә нинди һөнәр сайларга теләүләре турында сөйләде.

Фото: glavarb.ru