Тарих дәресенә игътибар артачак

Русия Мәгариф министрлыгы мәктәпләргә тарих дәресләрендә темаларның өйрәнү чиратын мөстәкыйль рәвештә үзгәртүне тыя. Укытучылар федераль эш программасында күрсәтелгән тәртипне төгәл үтәргә тиеш.

2026-27 уку елында 5-8 сыйныфларда тарих атнага өч сәгать, 9 сыйныфта ике сәгать укытылачак. Тарихка бирелгән сәгатьләр саны арткан, ә җәмгыять белеме дәресләре кимегән. Агымдагы елның 1 сентябреннән җәмгыять белеме гомуми мәктәпләрдә бары тик 9 сыйныфта гына кала.

Тарих программасына бөтендөнья һәм Русия тарихыннан тыш, “Туган як тарихы” төбәк курсы да керә. Агымдагы елда 5-9 сыйныфлар өчен бердәм дәүләт тарих дәреслекләрен мәктәпләргә кертү төгәлләнәчәк.

Шулай ук 1 сентябрьдән мәктәп программасында башка үзгәрешләр дә көтелә: чит телгә бирелгән сәгатьләр саны кими, “Русиянең рухи-әхлакый мәдәнияте” дигән яңа фән кертелә, ә “Русия – минем офыкларым” курсы 6-11 сыйныф укучылары өчен мотлак булачак.

 Фото:кремлин.ру