Барлык яңалыклар
Әни, укы, мин тыңлыйм!
1 апрель 2020, 15:05

Башак

Гаилә белән өйдә утырганда нишләргә? Өй җыештырып, ашарга әзерләп арыган вакытта ял итеп алыгыз, дуслар. Балалар белән бергәләп кызыклы, тәрбияви әкият укыгыз.

Башак
(Украин халык әкияте)
Борын заманда яшәгән, ди, ике тычкан баласы. Аларның берсе — Әйләнчек, икенчесе Бөтерчек исемле булган, ди. Тычканнар иртәдән кичкә кадәр җырлаганар, биегәннәр, әйләнгәннәр, бөтерелгәннәр — башка нәрсә эшли белмәгәннәр. Әтәч исә, яктыра башлау белән, җырын сузып, бөтен кешене йокысыннан уята, аннан соң эшкә тотына торган булган.
Менә беркөнне Әтәч, ишегалды себергәндә, җирдә бодай башагы тапкан.
— Әйләнчек, Бөтерчек, карагыз әле, мин нәрсә таптым, — дип, Әтәч аларны үз янына чакырган. Тычканнар йөгереп килгәннәр дә: «Аны суктырырга кирәк», — дигәннәр.
— Ә кем суктыра? — дигән Әтәч.
— Мин түгел, мин түгел, — дип чыелдашканнар тычкан балалары.
— Ярар, үзем суктырырмын, — дип, Әтәч эшкә керешкән.
Ә тычканнар, мәтәлчек ата-ата, куышлы уйнарга тотынганнар. Әтәч бодай башагын сугып бетергән дә: «Әй Әйләнчек, әй Бөтерчек, карагыз әле, мин күпме бөртек суктырдым», — дип кычкырган. Тычканнар йөгерешеп килгәннәр дә: «Хәзер бодайны тегермәнгә алып барырга кирәк», — дип кычкырганнар.
— Ә кем алып бара? — дип сораган Әтәч.
Тычкан балалары: «Мин түгел, мин түгел!» — диеп, уйнарга чыгып йөгергәннәр. Әтәч аркасына капчык аскан да тегермәнгә итеп барган. Тегермәннән кайткач, Әтәч тычканнарга: «Әй Бөтерчек, әй Әйләнчек, карагыз әле, мин он алып кайттым», —дигән. Тычканнар йөгерешеп килгәннәр дә Әтәчне мактарга тотынганнар: «Әй Әтәчкәй, әй булдыклы Әтәчкәй, әй уңган Әтәчкәй! Инде хәзер, камыр басып, күмәч пешерергә кирәк», — дигәннәр.
— Кем камыр баса? — дип сораган Әтәч.
— Мин түгел! — дигән Әйләнчек.
— Мин түгел! — дигән Бөтерчек.
Әтәч, бер сүз дә әйтмичә, эшкә тотынган. Ул камыр баскан, утын ташыган, мичкә яккан, күмәчне мичкә тыккан.
Тычканнар да вакытларын бушка уздырмаганнар: биегәннәр, җырлаганнар, әйләнгәннәр, бөтерелгәннәр. Пешеп чыккач, Әтәч күмәчне, мичтән алып, өстәлгә куйган. Ә тычкан балалары, чакырганны да көтмичә, өстәл янына килеп утырганнар.
— Һай, ничек ашыйсы килә! — дигән Әйләнчек.
— Минем дә бик-бик ашыйсы килә! — дигән Бөтерчек.
— Туктагыз, туктагыз, — дигән Әтәч. — Сез миңа элек әйтегез әле: башакны кем тапты?
— Син таптың! — дип кычкырганнар тычканнар.
— Ә башакны кем суктырды?
— Син суктырдың, — дигәннәр тычканнар, әкрен генә.
— Ә кем башакны тегермәнгә алып барды?
— Анысын да син, — дигәннәр болар икәүләшеп.
— Ә кем камыр басты? Кем утын ташыды? Кем мичкә якты? Күмәчне кем пешерде?
— Барсын да син, барсын да син, — дигән тычканнар, пышылдап кына.
— Ә сез нәрсә эшләдегез?
Ничек дип җавап бирергә дә белмичә, Әйләнчек белән Бөтерчек өстәл яныннан кузгалып киткәннәр.
Фото:publopicasso.ru
Читайте нас: