Кыш нинди була?

Михаил Пляцковский

Кыш нинди була?

Бервакыт Филдән сораганнар:

— Кыш нинди була?

— Ә ул нәрсә?  — дип гаҗәпләнгән Фил.

Бервакыт Төньяк Боланыннан сораганнар:

— Бәлки, син җавап бирерсең, кыш нинди була?

— Кыш бик озын була, — дигән Болан. — Ул минем туган җиремдә ел буе дәвам итә. Ә ел беткәч, кыш яңадан башлана.

Бервакыт кызыл күкрәкле Кызылтүштән сораганнар:

— Синеңчә, кыш нинди була?

— Кыш авыр була, — дип җавап биргән Кызылтүш. — Җимлеккә икмәк валчыкларын салырга онытмасалар, яхшы. Ә онытсалар, кайдан табарсың?

Бервакыт җирән Маэмайдан сораганнар:

— Кышның нинди икәнен беләсеңме?

— Бр-р-р! Салкын!  ­— дип һау-һау килгән Эт. — Ояң булса, яхшы! Анда җылынырга мөмкин.

Бервакыт Аюдан сораганнар:

— Син ни уйлыйсың, Топтыгин? Кыш нинди була?

— Ә аның турында нәрсә әйтәсең? —дип борын астыннан мыгырданган Аю.  — Кыш кыска була, нибары бер төнгә генә сузыла! Кыш көне өнеңдә йокларга ятасың, ә уянгач, карасаң, инде яз җиткән.

Бер көнне Малайдан сораганнар:

— Әйт әле, кыш нинди була?

— Кыш күңелле була! —дип кычкырган Малай. — Кышын барысы да чанада, чаңгыда һәм тимераякта шуа! Ә тагын кар атыш уйныйлар!