“Вакцина ясату — һәркемнең шәхси карары”

Вакцина ясату көне бүгенгә, 23 мартка планлаштырылган. Ил башлыгы бу хакта коронавирустан вакциналар җитештерүне арттыру буенча кичә узган киңәшмәдә белдерде.

"Вакцина ясату — ул һәр кешенең ирекле сайлавы, аның шәхси карары. Сүз уңаенан, мин моны иртәгә үк ясатырга ниятлим”, - дип китерә Президент сүзләрен “ТАСС” агентлыгы.

Соңрак Кремльнең матбугат секретаре Дмитрий Песков дәүләт җитәкчесенең Русиядә җитештерелгән өч вакцинаның берсен ясатачагын хәбәр итте.

“Бу безнең өч вакцинаның берсе булачак, - диде ул, сорауга җавап биреп. - Алар барысы да әйбәт һәм ышанычлы”.

Шуны да искәртик: бүгенге көндә Башкортстанга 130 942 доза “Гам-КОВИД-Вак” вакцинасы кайтты. 20 мартта "Башфармация" склады 8 400 доза вакцина кабул итте, 22 марттан республиканың медицина оешмаларына препарат бирү башланды. Беренче компоненты 118 361 кешегә (90,4 процент) ясалган, 58,2 процентка (76 166 кеше) вакциналау тулысынча төгәлләнгән.