+16 °С
Болытлы
Журналга язылу
Барлык яңалыклар
Шигъри күчтәнәч
26 апрель 2020, 13:35

Бүген — Тукай туган көн

Татар халкының бөек шагыйре Габдулла Тукайның тууына 134 ел.

Бүген, 26 апрельдә, татар халкы үзенең бөек шагыйре Габдулла Тукайның туган көнен билгели. Шагыйребез тууына быел 134 ел тула. Бик күп еллардан бирле халкыбызда матур традиция яши – шагыйрьнең туган көнендә татарлар яшәгән төбәкләрдә шигырь бәйрәмнәре үткәрелә. Тукай шигырьләре яңгырый, җырлары башкарыла. Әйдәгез, шагыйрьнең туган көнендә, аның киң билгеле шигырен укып хушланыйк!
Габдулла Тукай
Милли моңнар
Ишеттем мин кичә: берәү җырлый
Чын безнеңчә матур, милли көй;
Башка килә уйлар төрле-төрле, —
Әллә нинди зарлы, моңлы көй.
Өзлеп-өзлеп кенә әйтеп бирә
Татар күңле ниләр сизгәнен;
Мескин булып торган өч йөз елда
Тәкъдир безне ничек изгәнен.
Күпме михнәт чиккән безнең халык,
Күпме күз яшьләре түгелгән;
Милли хисләр белән ялкынланып,
Сызлып-сызлып чыга күңленнән.
Хәйран булып җырны тыңлап тордым,
Ташлап түбән дөнья уйларын;
Күз алдымда күргән төсле булдым
Болгар һәм Агыйдел буйларын.
Түзәлмәдем, бардым җырлаучыга,
Дидем: "Кардәш, бу көй нинди көй?"
Җавабында милләттәшем миңа:
"Бу көй була, диде, – "Әллүки!"
Фото:protatar.ru
Читайте нас: