Китап җанлы дусларга

Рәзилә НИЗАМИ

Китап җанлы дусларга

Минем бик яхшы дустым бар,

Аның исеме Җәббар.

Китап укуда ярышып

Җиңеп-җиңелгән чак бар.

Җиңүчегә бүләк – китап,

Китап җанлы дуслар без.

Китаплар яшәгән өйдә

Иң көтелгән кунак без.

Анда безне көтеп ала

Әкият, маҗаралар.

Килеп туган мең сорауга

Китапта бар җаваплар.

Китап өе, китап йорты -

Ул безнең китапханә.

Тылсымчыга охшап тора

Хуҗа апа Рәйханә.

Тау-тау китап арасыннан

Таба ул кирәклесен.

Җаббар ярата төслесен,

Ә мин эчтәлеклесен.

Кем җиңәр икән бу юлы

Безнең бәйге-ярышта?

Китапта җавап бар икән –

Дуслык җиңә иң башта!

Рида Шәйхетдинова рәсеме.