Күпереп торган йомырка тәбәсе

Нәкъ балачактагы кебек күпереп торган, сусыл, тәмле йомырка әзерләүнең төп сере – аны кыздырмый гына, су мунчасында әзерләүдә.

Безгә кирәк булачак:

йомырка –  3 данә.

сөт — 150 мл

тәменчә тоз

форманы майлау өчен акмай.

1. Эссегә чыдам (керамик, пыяла яисә металл) форма – таба алыгыз һәм аның эчен акмай белән майлагыз.
2. Тирән савытта йомыркаларны җиңелчә генә болгатыгыз. Шунысы мөһим: күбекләнгәнче болгатырга кирәкми, югыйсә пешкәч, “шиңәргә” мөмкин. Йомыркага сөт һәм тоз өстәп, янә болгатыгыз.
3. Әзер массаны формага салыгыз.
4. Су мунчасы әзерләгез. Киң төпле кәстрүлгә су салып, утка куегыз. Йомырка тәбәсе салынган табаны кайнап торган сулы кәстрүлгә куегыз. Су табага кермәслек булсын.
5. Табаны капкач белән каплагыз һәм йомырка тәбәсен 20-25 минут пешерегез. Беренче 20 минут капкачны ачмагыз, югыйсә ул кабарып пешмәячәк.
6. Табынга биргәндә туралган яшеллек, кыяклы суган сибәргә мөмкин.

Бу диетик һәм файдалы иртәнге аш белән гаиләгезне сөендерегез. Тәмле булсын!

Фото: onetable.ru