Әгәр күктәге Ай нурлар чәчеп ялтыраса...

6 ноябрьдә Ай нурларын чәчеп ялтыраса — җылыта, сызыкланып, калтырап күренсә — суыта, дигән сынамыш бар халыкта. Бүген күктәге түп-түгәрәк тулы Айга игътибар итик әле, дуслар. Кичә елның иң зур супер Ае тулды, ул бүген дә туп-тулы булып күренәчәк әле.

“Башгидрометүзәк” фаразлары буенча, якындагы өч көндә республикада начар һава шартлары көтелә.

Бүген, 6 ноябрьдә, республикада яңгыр һәм җепшек кар явачак, төньякта уртача явым-төшем булырга мөмкин. Кайбер районнарда бозлавык, тимер чыбыкларга һәм агачларга җепшек кар ябышуы, юлларда бозлавык булуы көтелә. Җил көнбатыштан уртача, урыны белән көчле тизлектә исәчәк. Көндез һава температурасы 0,+5 градус тәшкил итәчәк.

Җомга көнне, 7 ноябрьдә, шулай ук яңгыр явуы көтелә, республиканың көнчыгышында җепшек кар, тимер чыбыкларга һәм агачларга җепшек кар ябышуы, юлның аерым участокларында бозлавык булачак. Җил көньяк-көнбатыштан уртача, урыны белән җил көчәючән. Һава температурасы төнлә -2,+3 градус, көндез +2,+7 градус тәшкил итәчәк.

Шимбә, 8 ноябрьдә, явым-төшем ихтималы саклана. Җил көньяк-көнбатыштан, көнбатыштан уртача, төнлә урыны белән көчле җил. Һава температурасы төнлә -2,+3, көндез+1,+6 градус торачак.

Автор фотосы.