Әгәр кояш алтынсу шәүлә белән баеса...

Русия Гидрометүзәге мәгълүматлары буенча, июль аенда Башкортстан буенча уртача айлык һава температурасының норма (норма +19,2°) тирәсендә булуы көтелә. Айлык явым-төшем дә нормага якын булыр дип фаразлана (норма 50-70 мм).

Бүген, 1 июльдә, республикада урыны белән кыска вакытлы яңгырлар, яшенле яңгырлар явачак. Җил төньяктан талгын, көндез урыны белән көчле. Көндез температура +20, +25°.

2 июльдә урыны белән янә кыска вакытлы яңгырлар, төнлә төньяк-көнбатышта көчле яшен, көндез боз-борчак явуы ихтимал. Җил төньяктан, төньяк-көнбатыштан талгын, урыны белән көчле. Һава температурасы төнлә +10, +15°, көндез +20, +25°.

3 июльдә, аязучан болытлы һава торышы көтелә. Төнлә урыны белән бераз яңгыр явачак, көндез явым-төшемсез. Җил төньяк-көнбатыштан талгын. Һава температурасы төнлә +10, +15°, көндез +22, +27°.

Халык сынамышларына да колак салыйк. Бүген, 1 июльдә, кояш алтынсу-сары, алсу шәүлә белән байый икән, яхшы һава торышына.
Айның яшел төскә керә башлавы - көчле корылык килү билгесе.

Автор фотосы.