Үсмер кыз машинаны кюветка очырган...

Зилаер районында ике балигъ булмаган бала катнашлыгында авария булган. Байгуҗа-Бикҗан юлында "Renault Logan" машинасы кюветка очкан.

Автомобиль белән Сибайда яшәүче 17 яшьлек кыз идарә иткән була. Ул руль артына машина йөртү таныклыгы булмаган килеш утырган. Нәтиҗәдә, аның янында булган 8 яшьлек пассажир кыз тән җәрәхәтләре алган һәм дәваханәгә озатылган.

Бәхеткә, кызларның икесе дә исән. Транспорт чарасы - ул уенчык түгел. Шуңа да машина белән идарә итүгә җитди карарга кирәк. Мондый очракта бигрәк тә әти-әниләр игътибарлы булсыннар, җаваплылык тойсыннар иде. Ни дисәң дә, юл хаталарны кичерми!