Юрүзән елгасы буенда 7 яшьлек кыз югалган...

Кичә, 12 август көнне, Салават районының Татар Малаязы авылы тирәсендә, Юрүзән елгасы буенда 7 яшьлек кыз югалган. Ул бирегә әтисе белән балык тотарга килгән булган.

Әтисе балык кармаклаган арада кыз яр буендагы машина янына чәчәкләр җыйган. Беркадәр вакыттан соң, ир баланың якын-тирәдә юклыгын аңлап алган. Эзләп таба алмагач, коткаручыларга хәбәр иткән.

Коткаручылар баланы Мөсәт авылы яныннан тапканнар. Ул 5 чакрым җәяү китеп өлгергән һәм юлын тагын да дәвам иткән була. Бәхеткә, кыз исән-сау, табиб ярдәме кирәкмәгән.

Елга-күл буйларына, урманга балалар белән бару аеруча игътибарлы булуны сорый. Сабыйларыгызны күз уңыннан ычындырмагыз, ялларыгыз хәвеф-хәтәрсез үтсен, әти-әниләр!