3 яшьлек сабый әти-әнисе белән “качышлы” уйнаган...

Ульяновск өлкәсенең Засвияжск районында коточкыч фаҗига булган. Уен вакытында 3 яшьлек малай үлгән.

Баланың әти-әнисе сүзләренә караганда, алар өйдә уллары белән “качышлы” уйнаган. Бала үз бүлмәсенә кереп качкан. Ярты сәгать чамасы ул өлкәннәрнең чакыруына җавап бирмәгән.

Кызганычка каршы, әти-әнисе баланы бик соң тапкан. Сабый трансформер-кровать эченә кереп качып, һава җитмәүдән үлгән.

Ульяновск өлкәсе прокуратурасы баланың үлем факты буенча тикшерү үткәрә.

Кечкенә балалар тәрбияләүче әти-әниләргә мондый уеннар вакытында бик сак, уяу булырга кирәк. Чөнки шкаф, диван, суыткыч эченә кереп, сабыйның үзаллы чыга алмау куркынычы бар. Ходай сакласын...

Фото: gazeta.ru