Коронавирус белән авыручылар 88гә артты

20 майга алынган оператив мәгълүматларга караганда, Башкортстанда 2 335 коронавирус йогышы белән зарарлану очрагы ачыкланган. Тәүлек эчендә алар 88 кешегә артты, дип хәбәр ителә стопкоронавирус.рф сайтында.

Хәзерге вакытта төбәктә авыручылар саны — 1 603 кеше, сәламәтләнүчеләр — 714, шулай ук яңа коронавирус инфекциясеннән үлүнең янә бер очрагы теркәлгән.

Русиядә беренче тапкыр коронавирустан савыгучылар саны авыручылар саныннан артып китте. Соңгы тәүлек эчендә 84 төбәктә яңа коронавирус йогышы белән авыручы 8 764 кеше ачыкланды. Шул ук вакытта 9 262 кеше савыгып дәваханәдән чыккан. Илнең барлыгы 85 төбәгендә 308 705 авыру ачыкланган, ә савыгучы пациентлар саны 85 392 кешегә кадәр арткан.

Шулай ук тәүлек эчендә 135 үлем очрагы теркәлгән. Бөтен вакыт эчендә Русиядә коронавирустан 2 972 кеше үлгән.