59 бала — гаилә җылысында!

Башкортстанда ел башыннан 59 бала уллыкка алынган, бу узган елның шул ук чоры белән чагыштырганда 9 балага күбрәк. Бу хакта республика гаилә, хезмәт һәм халыкны социаль яклау министры Ленара Иванова хәбәр итте.

"Бүген — Бөтендөнья уллыкка алу көне. Күптән түгел — 2014 елда календарьның махсус көне барлыкка килде. Бу көнне бөтен дөнья гаиләгә мохтаҗ балаларга һәм тәрбиягә бала алган ата-аналарга теләктәшлек белдерә”, - дип искәртте министр.

Аның сүзләренчә, бүген Башкортстанда 10 609 ятим һәм ата-ана каравыннан мәхрүм калган бала яши. Быел аларның 1200дән артыгы төрле яшәү рәвешен кулланып гаиләләргә урнаштырылган, ә 17 бала үз гаиләләренә кайткан.

"Уллыкка бала алырга карар иткән республика гаиләләре ана капиталы күләмендә сизелерлек финанс ярдәменә өмет итә ала. Беренче баланы уллыкка алганда — төбәк бюджетыннан түләү 587 мең сумга якын, икенче яки аннан соңгы балалар өчен 775 мең сумнан артык тәшкил итәчәк. Инвалид баланы уллыкка алганда финанс ярдәме күләме тагын 100 мең сумга арта. Акчаны гаиләнең торак шартларын яхшыртуга, дәвалауга, шифаханә-курорт сәламәтләндерүгә яки уллыкка алынган балага белем бирүгә юнәлтергә мөмкин”, — дип сөйләде Ленара Иванова.

Фото: bashinform.ru