Бала Затон күпереннән җәяү атлаган...

Уфада 3нче сыйныф укучысы Затон күпере аша өенә җәяү кайтып барган. Аны автобус водителе төшереп калдырган.

Алексеевка шоссесы буйлап китеп баручы кызга икенче бер машина водителе игътибар иткән. Укучы кыз аңа “Галле шәһәре урамы” тукталышында 115нче автобуска утыруы турында сөйләгән. Әмма водитель баланы төшереп калдырган, чөнки аның түләве үтмәгән.

"Ул  “Галле”дан Затон күпере, юл чишелеше аша үткән һәм җәяү юл буйлап китеп бара иде — беркем дә туктамаган. Баланы кирәкле тукталышка кадәр алып барса, автобус йөртүче ярлыланыр идеме әллә? Бала өшегән, күшеккән иде. Шулкадәр машиналар узган, һәм беркем дә туктарга уйлап та карамаган", — дип сөйләгән бу хәлгә аптыраган ир.

Кызның телефоны сүнгән, ә картасында акча беткән була. Башка чара таба алмагач, ул өенә җәяү кайтырга була. Очраклы туктаган ир баланың әнисе белән элемтәгә кергән һәм кызны өенә кадәр илтеп куйган.

Исегезгә төшерәбез, 2021 елда җәмәгать транспортының барлык төрләре водительләренә, хәтта аларның юл хакын түләү мөмкинлеге булмаса да, балигъ булмаганнарны транспорттан төшереп калдыруны закон тарафыннан тыйдылар.

Фото:UTV