Кышын кулыгызны кесәгә тыгып йөрмәгез!

Бозлавык – кышын куркыныч тудырган төп әйбер. Тайгак юлда егылу бәрелүгә, имгәнүгә, кул-аяк, хәтта умыртка баганасы сынуга китерергә мөмкин. Бозлавыкта егылып, имгәнүләр алмас өчен түбәндәге киңәшләргә колак салыгыз:

–​ кышкылыкка асты резинадан яки термопласттан ясалган, үкчәсез аяк киемен сайлагыз;

–​ аяк киеме табанына  берничә кат лейкопластырь яисә эре бөртекле наждак кәгазе ябыштырырга мөмкин;

–​ бозлавык юлда ашыкмый, кискен хәрәкәтләр ясамый, вак-вак адымнар белән атлагыз;

– аяклар тез яныннан бераз бөгелгән, гәүдә алгарак иелгән булсын;

–​ кулларны кесәгә тыгып йөрмәгез. Егылганда, аларны сындыру ихтималы зур;

–​ таеп китеп, аркага егылганда иякне күкрәккә кысу мөһим, бу баш мие җәрәхәтенә китерүдән саклаячак;

әгәр егылган кеше кискен авырту кичерсә, кул-аякларын сизмәсә, хәрәкәтләнә алмаса, тиз арада ашыгыч ярдәм чакыртырга кирәк;

–табиблар килгәнче кешене кузгатырга яисә борырга ярамый, чөнки бу хәлне начарайтырга гына мөмкин.