10 яшьлек бала мопедта чаба

Уфаның Рассветная урамында 10 яшьлек малай мопедта җилдергән. Аны юл-патруль хезмәте инспекторлары күреп алган.

Әлбәттә, бу яшьтә малайның машина йөртү таныклыгы булмаган. Уфа Дәүләт автоинспекциясе мәгълүматлары буенча, урынга әти-әнисен чакыртканнар, баланы транспорт белән идарә итүдән читләштергәннәр.

Балигъ булмаганнарны тәрбияләү һәм карау буенча бурычларны тиешенчә үтәмәгән өчен материалларны балигъ булмаганнар эшләре һәм аларның хокукларын яклау комиссиясенә тапшырганнар.

Фото: Уфа Дәүләт автоинспекциясе матбугат хезмәте