Баллы ризык балаларда шикәр диабеты китереп чыгарамы?

Балаларның баллы ризыклар куллануы һәм шикәр диабеты барлыкка килүнең үзара турыдан-туры бәйләнеше турындагы киң таралган ышану хаталы булып тора. Бу хакта Уфаның 5нче балалар поликлиникасыннан балалар эндокринологы Ангелина Березко хәбәр итә.

Табиб ассызыклаганча, татлы ризыклар үзләре үк диабет китереп чыгармый. Ул әти-әниләрнең игътибарын бала туклануында баланс саклауның мөһимлегенә юнәлтә, чөнки хәзерге балаларда артык гәүдә авырлыгы һәм симерү проблемалары ешрак очрый. Бу югары гәүдә авырлыгы булган пациентларга хас икенче типтагы диабет үсеше куркынычын шактый арттыра.

Моннан тыш, организмның иммун системасы бозылу белән бәйле беренче типтагы диабет барлыкка килү очраклары да бар, ул вакытта саклагыч көчләр инсулин гормонын эшләп чыгару өчен җаваплы ашказаны асты бизенең эшчәнлеген боза башлый. Авыру ешрак дүрт яшьтән җиде яшькә кадәр һәм уннан унике яшькә кадәр балаларда очрый, шулай ук мондый диагноз сабыйларда да, унҗиде яшьтән өлкәнрәк үсмерләрдә дә барлыкка килергә мөмкин.

Проблеманы вакытында ачыклау өчен ата-аналарга характерлы симптомнарга аерым игътибар бирергә киңәш ителә, алар арасында даими сусау, бигрәк тә төнлә еш кына бәдрәфкә йөрү, гәүдә авырлыгын югалту очрагында аппетитның кискен артуы. Әгәр балада мондый билгеләр күренсә, кандагы глюкоза күләмен белү өчен лаборатор тикшерү узарга кирәк.

Автор фотосы.