Күпләр көткән яңалык...

Сәламәтлек саклау министрлыгы яман шешләрне дәвалау өчен меланома һәм пептид вакцинасын терапияләү өчен вакциналар кулланырга рөхсәт итте. Бу хакта дарулар белән тәэмин итү мәсьәләләре буенча коллегия утырышында Сәламәтлек саклау министры Михаил Мурашко хәбәр итте.

 Ведомство җитәкчесе ассызыклавынча, бу дәвалауга инновацион якын килүне куллануның башы гына һәм галимнәргә аның нәтиҗәлелеген һәм хәвефсезлеген бәяләргә кирәк булачак. Шуңа күрә вакциналарны киңкүләм куллану турында әлегә сүз бармый.

 Билгеле булуынча, меланома терапиясе өчен мРНК-вакцинаны Гамалея исемендәге үзәк һәм Блохин исемендәге онкология үзәге галимнәре бергәләп эшләгән. Аны Сәламәтлек саклау министрлыгының радиология үзәге җитештерә. Препарат операция ясап булмый торган яисә метастатик тире меланомасы булган өлкән пациентларны дәвалау өчен каралган.

 Яман шеш терапиясе өчен пептидлы вакцинаны Ю.М. Лопухин исемендәге физик-химик медицина үзәгендә (ФМБА) метастатик колоректаль яман шеш белән авыручыларны дәвалау өчен эшләгәннәр.

 мРНК-технологияләр нигезендә онковакцина — бик перспективалы эшләнмә, дип белдергәннәр элегрәк галимнәр. Аның асылы пациенттан шеш материалын алудан, аның үзенчәлекләрен анализлаудан һәм “шеш паспорты” булдырудан гыйбарәт, ул аннары персональләштерелгән вакцина өчен кулланыла, пептидларның шәхси җыелмасы синтезлана. Вакцина кешенең иммун системасын шеш күзәнәкләрен төгәл танырга һәм юк итәргә “өйрәтә".