Изге күңелле әни

Дәүләкән районыннан Миңсылу Мират кызы Галләмова 2013 елда өч бертуган балаларны үз йортына тәрбиягә алган. Шушы еллар эчендә аның йорты Луиза, Линар һәм Тимур өчен чын терәк була. Бүген өлкәннәре инде үсеп буйга җиткән, һәркемнең үз юлы бар, әмма тәрбиягә алган әниләре белән элемтә ныклы булып кала.

Линар, мәктәпне тәмамлагач, эретеп ябыштыручы һөнәрен ала. Әлеге вакытта ул Русия Кораллы Көчләрендә хезмәт үтә.

Луиза Уфа индустрия һәм сервис колледжын кызыл дипломга тәмамлап, пешекче-кондитер белгечлеге алган һәм һөнәре буенча эшли. Ләкин ул моның белән генә тукталып калмаган: балачак хыялын тормышка ашыру өчен, кыз визажист һәм чәчтараш курслары үткән һәм хәзер яраткан эше белән өстәмә акча эшли.

Иң кечесе — Тимур 9нчы сыйныфны тәмамлап, электромонтер һөнәрен сайлаган һәм бүген Стәрлетамак политехника колледжының икенче курсында укый. Педагоглар аның җаваплылыгын, яхшы игелеклелеген һәм укуга җитди мөнәсәбәтен билгели. Ә буш вакытта ул волейбол һәм баскетбол уйнарга ярата.

Миңсылу Мират кызы балаларның мөстәкыйль, хезмәт сөючән һәм үз-үзләренә ышанычлы булып үсүенә күп көч куйган. Луизаны ул кечкенәдән ашарга пешерергә, бәйләргә, хуҗалык эшләрен алып барырга, малайларны исә ышанычлы булырга һәм көнкүреш бурычларын үти белергә өйрәткән.Балаларның дөрес һөнәр сайлавы — аның сабырлыгы, кайгыртучанлыгы һәм ихтирамлы тәрбиясе нәтиҗәсе.

Гаиләдә һәрвакыт ышанычлы һәм дустанә мөнәсәбәт: балалар өйдә булыша, ял көннәрен бергә үткәрә, җәй көне бергәләп Аслыкүл буена чыгарга яраталар. Алар авырлыклар килеп туса, бергә хәл итәләр.

Миңсылу Мират кызы — актив тормыш позициясе кешесе. 2023 елның мартыннан ул — "Za наших" Игелек һәм кайгырту хәйрия остаханәсенең алыштыргысыз ярдәмчесе, анда башка "көмеш" волонтерлар белән бергә маскировка челтәрләре үрәләр. Изге эшләре һәм катнашуы өчен ул Дәүләкән районы хакимиятенең Рәхмәт хатына һәм Гаиләгә, балаларга һәм яшьләргә ярдәм үзәге грамотасына лаек булган.

Фото: Гаилә, хезмәт һәм халыкны социаль яклау министрлыгы сайтыннан.