Сөт тешләрен алдырырга ашыкмагыз!

Сөт тешләре - киләчәктә матур елмаю өчен нигез. Аларны еш кына «вакытлыча» дип атыйлар. Ләкин сөт тешләрен дәваламау, аларның начар торышы даими тешләрнең үсүенә тискәре йогынты ясарга, тешләүнең бозылуына һәм сөйләм белән проблемаларга китерергә мөмкин. Бу хакта табиб-стоматолог Дарья Демьянова кисәтә.
Белгеч әйтүенчә, сөт тешләрен дәвалау балалар өчен бик мөһим һәм моның берничә сәбәбе бар.
Беренчедән, даими теш чыкканчы ук зарарланырга мөмкин. Вакытында дәваланмаган очракта даими теш яралгысы тулысынча үләргә мөмкин, бу урында теш беркайчан да үсмәячәк, дип кисәтә Дарья Демьянова.

Шулай ук сөт тешләре даими тешләр өчен урын “саклаучы” булып хезмәт итә. Кариесны иртә стадиядә дәвалау сөт тешләрен физиологик алышынуга кадәр сакларга мөмкинлек бирә, бу киләчәктә дөрес тешләү һәм тигез елмаю өчен нигез булачак. Әгәр дә сөт тешләре вакытыннан алда алынса, бу тешләүнең бозылуына һәм теш рәтенең деформациясенә китерә.
Моннан тыш, тешләрнең вакытыннан алда алынуы баланың ашкайнату системасына тискәре йогынты ясый. Начар чәйнәлгән ризык гастритларга һәм ашкайнатуның белән проблемаларга китерә. Шулай ук сөт тешләре кариесы казналыкның дөрес үсмәвен китереп чыгарырга мөмкин. Сөт тешләре казналык формалашуда катнаша: бала чәйнәгәндә йөкләнеш сөяккә күчә, бу казналык үсешен стимуллаштыра.

"Сөт тешләренең, бигрәк тә алгы тешләренең иртә югалуы баланың интеллектуаль үсешенә дә тискәре йогынты ясый. Алгы сөт тешләре авазларны һәм сүзләрне дөрес әйтүдә мөһим роль уйный", - ди табиб.

Кыскасы, сөт тешләре турында кайгырту - ул бүгенге матурлык өчен генә түгел, ә киләчәктә сәламәт булу өчен дә бик кирәк.

Фото: нейрочелтәрләрдән