327 кешене талпан тешләгән

Башкортстанда талпан тешләве аркасында мөрәҗәгатьләр саны кимегән, әмма эпидемиологлар уяулыкка өнди. “Роспотребнадзор”ның Башкортстан буенча идарәсе хәбәр итүенчә, 16 апрельгә булган мәгълүматларга караганда, талпан кадалу буенча медицина оешмаларына 327 кеше мөрәҗәгать иткән. Бу узган елның шул ук чоры күрсәткеченнән азрак, ул вакытта 428 мөрәҗәгать теркәлгән.

Зыян күрүчеләрнең 40,9 процентын балалар тәшкил итә — урамда уйнаган вакытта аларның хәвефсезлеген аерым контрольдә тоту кирәклеген дәлилләүче борчулы күрсәткеч.

Гигиена һәм эпидемиология үзәгендә һәм аның филиалларында бөҗәкләрне аларның талпан вируслы энцефалиты, боррелиоз һәм башка инфекцияләр белән зарарлануын тикшерү өчен тапшырырга мөмкин. Пунктларның эш графигы белән ведомствоның рәсми сайтында танышырга була.

Талпаннардан саклану өчен урманга, кырга чыкканда тыгыз итеп киенергә кирәк. Җиргә утырырга һәм ятарга киңәш ителми. Ял итү өчен ачык, кояш яхшы яктырткан урынны сайлагыз. Урманда вакытта 1-2 сәгать саен өс-башларны тикшереп торырга кирәк. Талпаннарның кеше тәнендә иң яраткан урыннары — колак арты, култык асты өлешләре, эчнең түбән өлеше.

Әлбәттә, бу бөҗәкләргә каршы төрле сиптергечләр, сөртә торган препаратлар да бар. Ничек кенә булмасын, бу куркыныч бөҗәкләрдән үзегезне дә, балаларны да саклагыз. Табигатьтә йөреп кайтканнан соң үзеңне, балаларны, йорт хайваннарын җентекләп тикшерү мөһим.

Фото:progorod33.ru