Кышкылыкка алмалы-сливалы компот

Алмалы-сливалы компот болай әзерләнә:

*Иң элек өч литрлы банкаларны сода белән яхшылап юып, парда яисә духовкада стерильләштерергә кирәк. Тимер капкачларны да яхшылап юып, суда кайнатып алабыз.

*Компот өчен әчкелтем-баллы алмалар алсагыз яхшырак булыр. Аларны юып, суын саркытыгыз. Эре булсалар, дүрт өлешкә бүлегез, эчен тазартыгыз. Ә сливаларны бөтен килеш салсагыз да ярый. Аларның төшләре компотка аерым тәм бирә.

*Җимешләрне банкага салыгыз, алар 1/3 өлеш булсын.

*Хәзер кайнап чыккан суны банкага тутырып салабыз һәм капкачын 10-15 минутка каплап куябыз.

*Аннары суны кәстрүлгә бушатып, бер өч литрлы банкага 250 грамм исәбеннән шикәр комы салабыз да янә кайнатып чыгарабыз.

*Әзер сиропны банка тулганчы коябыз һәм тимер капкач белән ябабыз.

*Банканы әйләндереп, төреп куябыз һәм суынганчыга кадәр шулай тотабыз.

Алмалы-сливалы компот бик тәмле була. Өстәвенә, үзең әзерләгән файдалы да әле.