Сабыйлар мәхәбәттә, иминлектә үссеннәр!

12 мартта Әбҗәлил районының ЗАГС бүлеге хезмәткәрләре Билалов гаиләсендә дөньяга килгән бишенче сабыйга туу турында таныклык биргәннәр.

Яңа Балапан авылында яшәүче Азамат һәм Физәлия Билаловларның тату гаиләсе күпләргә үрнәк. 1 мартта туган нәни Фатыйманың өч абыйсы һәм апасы бар. Өлкән абыйсы Данил мас-рестлинг белән мавыга, егет республика һәм Русия бәйгеләре призеры. Денис – сноубордчы, әти-әнисе аның мавыгуларын хуплый. Малайны танылган Абзак тау чаңгысына күнекмәләргә йөртәләр. Далгат әле мәктәпкәчә яшьтә, әмма ул да абыйларыннан һич калышмый, хоккей һәм футбол уйнарга ярата. Ә ике яшьлек Ясминә бергә уйнар өчен яңа туган сеңлесенең үсүен түземсезлек белән көтә.

Гаилә башлыгы Хәйбулла районында вахта ысулы белән эшли. Ә аның хатыны хуҗалык алып бару белән генә чикләнми, үз мавыгулары ярдәмендә акча эшләргә дә өлгерә – сатуга пироглар һәм тортлар пешерә, гүзәл затларга керфекләр үстерә, маникюр, макияж ясый.

Билаловлар үз йортларын салып чыкканнар.

“Бәхетле әти-әнигә һәм балаларга ныклы сәламәтлек телибез, сабыйлар мәхәббәттә, тынычлыкта һәм иминлектә үссеннәр. Ныклы гаилә – дәүләт терәге”, - дип язган социаль челтәрләрдә Башкортстан Республикасы Юстиция эшләре буенча дәүләт комитеты җитәкчесе Владимир Спеле.

Фото: Башкортстан Республикасы Юстиция эшләре буенча дәүләт комитеты матбугат хезмәте