Кыш дип тә тормыйлар...

Стәрлетамак районында 12 яшьлек малайны квадроцикл руле артында туктатканнар. Бу хакта Дәүләт автоинспекциясе начальнигы Владимир Севастьянов социаль челтәрләрдә хәбәр итте.

Балигъ булмаган баланы идарә итүдән читләштергәннәр, ә урынга әтисен чакыртканнар. Малайның әти-әнисенә карата административ беркетмә төзелгән.

Административ материалларны рәсмиләштерү вакытында әти кеше үзен тыныч тоткан. Ә инде квадроциклны эвакуацияләүләре турында ишеткәч, ул транспортны алып китмәкче була. Инспектор белән сөйләшкәннән соң, ир тынычланган. Квадроциклны махсус штрафстоянкага урнаштырганнар.

"Хөрмәтле әти-әниләр, балаларыгызны куркыныч астына куймагыз! Аларга транспорт чаралары белән идарә итәргә рөхсәт итмәгез!" - дип мөрәҗәгать иткән ведомство җитәкчесе.

Фото: ДАИ матбугат хезмәте