12 магнит шары йоткан...

Башкаланың Ашыгыч медицина ярдәме дәваханәсе балалар хирурглары магнит шарларын йоткан баланы коткарган.

 10 яшьлек кызны медицина учреждениесенә бик каты эч авыртуы белән китергәннәр. Ачыклануынча, бер атна алдан бала 7 магнит шары йоткан. Әти-әнисе, яхшыга өметләнеп, аларның табигый юл белән чыгуын көткән. Әмма бер-ике көннән организмга тагын берничә шундый ук куркыныч шар эләккән.

 Дәваханәдә табиблар баланың ашкайнату трактында 12 магнит тапкан. Мондый магнитлар эчәклекнең өлешләрендә бер-берсенә тартылып, тукымаларда некроз, перфорация һәм үлем куркынычы булган перитонит китереп чыгарырга мөмкин.

Хирурглар ашыгыч операция ясап, авыр катлаулануларны булдырмый калган, магнитларны алганнар.

Әти-әниләр, магнит – ул уенчык түгел, бала сәламәтлеге өчен зур куркыныч тудыра. Сак булыгыз, мондый предметларны, уенчыкларны сабый кулы җитмәслек урынга алып куегыз.

Фото: Сәламәтлек саклау министрлыгы матбугат хезмәте